Алтынкөз қабыланы Үстірт қорығының аумағында қайта байқалды

2026 жылдың наурыз және мамыр айларында Үстірт қорығының аумағында біздің ескі танысымыз қайта көрінді. Бұл – алғаш рет 2024 жылы фототұзаққа түсіп, кейін балалар суреттері байқауының қорытындысы бойынша «Алтынкөз» деген жеке есімге ие болған аталық қабылан.

Қызығы сол, 2026 жылдың сәуір айында дәл осы қабыланды Қызылсай табиғи паркінің қызметкерлері өз аумағында байқап, тіпті ұялы телефон камерасына түсіріп алған. Осылайша, наурыз бен мамыр айлары аралығында Алтынкөз қорықтан Қызылсайға дейін барып және кері қайту арқылы кем дегенде 450 км қашықтықты жүріп өткен. Ол 2025 жылы да шамамен осындай бағытты артта қалдырған болатын. Мамандардың пікірінше, қабылан ұрғашысын іздеп тұрақты түрде ұзақ сапарларға шығады. Алайда, өкінішке қарай, оның бұл әрекеттері әзірге нәтижесіз. Себебі ұрғашы қабыландар аталықтарға қарағанда мұндай алыс қашықтықтарға жүруге бейім емес. Сонымен қатар, бізде Түрікменстаннан Үстірт жазығының қазақстандық бөлігіне ұрғашы қабыландардың кіргені туралы нақты деректер әзірге жоқ, дегенмен мұндай мүмкіндікті толықтай жоққа шығаруға да болмайды.

Маңғыстау аумағындағы қабыланның қозғалысына мониторинг жүргізу Үстірт қорығы мен Қызылсай табиғи паркі қызметкерлерінің табысты ынтымақтастығының арқасында мүмкін болды. Бұл ынтымақтастық Қазақстанда қабыланды зерттеу және қорғау жөніндегі халықаралық жоба аясында 2023 жылы басталған болатын, ал жобаны «Биоалуантүрлілікті зерттеу және сақтау орталығы» (BRCC) қоғамдық қоры үйлестіреді. Қазақстандағы қабылан және оны зерттеу мен қорғау жобасы туралы толығырақ мына жерден білуге болады.